La gronda sfida ei la finanziaziun dil credit da baghegiar da frs. 1,8 miu. Nossa pleiv ei buca habla da purtar sezza tut ils cuosts ed ei dependenta da sustegn finanzial. Adina puspei vegn plidentau la suprastonza dalla pleiv sco era la cumissiun da baghegiar che cun quella aulta investiziun seigi ina sanaziun buca realistica. La suprastonza dalla pleiv ha lu en collaboraziun cun la planisadra, dunna Marlene Gujan, empruau d'etapar l'investiziun, vul dir da reparter ils cuosts sin plirs onns.

Ina proposta dalla menadra dil project ei en consequenza stada da menar atras la sanaziun en 3 etappas. Ell'emprema etappa duevan lu sulettamein las lavurs da sanaziun probablamein las pli necessarias vegnir fatgas. En in emprem preventiv fussen ils cuosts per l'emprema etappa stai entuorn frs. 1'130'000.-. En ina secunda etappa eran ca. frs. 570'000.- ed ella tiarza etappa aunc frs. 100'000.- previ.

Ensemen culla menadra dil project ei la suprastonza dalla pleiv s'exprimida encunter, quei ord dus motivs. Entras l'etappaziun resultassen supplementarmein cuosts da ca. frs. 150'000.-, pertgei ella secunda etappa stuessen puspei palancaus per la sanaziun dil tetg vegnir tschentai. Plinavon fa ei pauc senn da renovar il spazi intern sco era la fatschada e leutier sanar il tetg pér en 5-10 onns. Cheutras fuss il fundament buca protegius entras adversitads d'ordeifer e stuess pli tard puspei vegnir reparaus. In secund motiv ei la finanziaziun, la quala stuess vegnir aviarta da niev per tut las etappas. Ina lavur supplementara pils responsabels e buca d'emblidar, in'incarica difficila da rimnar adina puspei daners pil medem project ed anflar sustegn finanzial.

Nossa proposta da trer atras il project en inaga ha era anflau gronda accoglientscha alla radunonza generala extraordinaria, quei era suenter dubis all'entschatta, che han saviu vegnir allontanai culs motivs suranumnai. Ord patratgs culturals e historics eis ei nossa obligaziun da mantener baghetgs sacrals antics tenor meglier saver e puder.

Cheusut anfleis vus las pli impurtontas posiziuns co nus s'imaginein la finanziaziun dil credit da baghegiar:

La suprastonza dalla pleiv ed era la cumissiun da baghegiar ein pertscharts che la proposta da finanziaziun lai anavos certs dubis aviarts. Ils medems dubis existevan denton era gia tier la sanaziun dalla baselgia parochiala a Breil e grazia allas stentas dallas persunas involvidas sco era dils indigens eis ei reussiu da realisar la finanziaziun sco previu. Perquei essan nus era oz perschuadi da saver dumignar quei pensum da Hercules grazia ad in vast sustegn. La populaziun dalla pleiv d'Andiast stat plinavon cumpleinamein davos il project e s'engascha per saver recaltgar ils daners da donaziun giavischai.

Sche Vus sedecideis da medemamein vuler sustener nies grond project da sanaziun essan nus ed oravontut la populaziun el bi vitg d'Andiast a Vus da cor engrazieivels. Sut il link donaturs/fauturs anfleis Vus ils detagls corrispundents davart il pagament. Secapescha sa la donaziun era vegnir fatga sur il code QR.

Cordial engraziament per Vies sustegn e Dieus paghi!