Cordial beinvegni 

Il fresco da Sogn Cristoffel

Il fresco da Sogn Cristoffel era buc adina vesibels sco quei ch’el ei ussa. Els onns 60 ha igl architect Georg Berther creau ils plans per ina nova nav baselgia per la baselgia parochiala Breil, ord il motiv che la baselgia veglia era memia pintga. La tuor ei lu vegnida incorporada cun gronda curascha el niev baghetg modern. Duront quei process ei il grond fresco sin la fatschada dil clutger vegnius alla glisch. Dapi lu paradescha Sogn Cristoffel giud il clutger amiez il vitg da Breil. Oz, pia in miez tschentaner suenter ei buc da surveser ch’il fresco da ca 2.9 meters ladezia e 6.5 meters altezia basegna ina remedura. La cumissiun da baghegiar vul mantener il fresco. Ils cuosts per la restauraziun da tal muntan a frs 55’000.-. Las lavurs vegnan exequidas la stad 2020 ensemen cun ina sanaziun energetica e tecnica sco era lavurs egl intern dall’entira baselgia. La pleiv fa totalmein investiziuns dad 1.25 milliuns francs.

Nus engraziein grondamein per vies sustegn.

Il fresco da Sogn Cristoffel sin la fatschada dil clutger baselgia Breil vegn restauraus. Sustegn era ti la restauraziun cun cumprar simbolicamein ina ni pliras parts dil fresco.

Cun cliccar sil maletg vegnas ti tier il sistem da reservaziun nua che ti sas eleger la part che ti giavischas da cumprar.

Cordial engraziament!

SRF Pled sin via 

Il pled sin via dils 28 da fenadur 2018 cun Flurina Cavegn-Tomaschett, gidontra pastorala